विराटनगर / नेपाल प्रिमियर लिग (एनपीएल) अन्तर्गत बुधबार सम्पन्न खेलमा काठमाण्डू गुर्खाजले लुम्बिनी लायन्सलाई १८ रनले पराजित गरेको छ। यस हारसँगै लुम्बिनी प्लेअफ होडबाट बाहिरिएको छ।
काठमाण्डूले दिएको १०४ रनको लक्ष्य पछ्याउने क्रममा लुम्बिनी १९.२ ओभरमा ८५ रनमा अलआउट भयो। लुम्बिनीका लागि सन्दीप जोराले २९ बलमा २ चौकासहित सर्वाधिक २६ रन बनाए। उन्मुक्त चन्दले १४ रन र सूर्य तामाङले अविजित ११ रन जोडे। अन्य कुनै पनि खेलाडीले दोहोरो अंक छुन सकेनन्।
काठमाण्डूका कप्तान करण केसीले ४ ओभरमा १६ रन खर्चेर ४ विकेट लिए। दीपेश कँडेलले ४ ओभरमा मात्र ६ रन दिएर ३ विकेट लिए। जेरार्ड एरासमसले २ र रासिद खानले १ विकेट लिए। शाहब आलमले विकेट नलिए पनि ४ ओभरमा मात्र १० रन खर्चिए।
यसअघि, कीर्तिपुरस्थित टीयू अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको काठमाण्डूले १९.२ ओभरमा सबै विकेट गुमाएर १०३ रन मात्र बनाउन सक्यो। काठमाण्डूका लागि भीम शार्कीले ३१, डान डौथवेटले २१, प्रतीक श्रेष्ठले २०, र स्टेफेन इस्किनाजीले १३ रन जोडे।
लुम्बिनीका बलर साद विन जफरले ४ ओभरमा २१ रन खर्चेर ३ विकेट लिए। रामोन सिमोण्ड्स र अभिषेक गौतमले २–२ विकेट लिए। सूर्य तामाङ र विवेक यादवले १–१ विकेट झारे।
आजकै अर्को खेलमा सुदूरपश्चिम रोयल्सले जनकपुर बोल्ट्सलाई ७२ रनले पराजित गर्यो। १२४ रनको लक्ष्य पछ्याउने क्रममा जनकपुर १२ ओभर १ बलमा ५१ रनमै समेटियो।
जनकपुरका लागि जोशुआ ट्रोम्पले सबैभन्दा धेरै १३ रन बनाए। अन्य कुनै खेलाडीले दोहोरो अंकमा रन बनाउन सकेनन्। सुदूरपश्चिमका हरमीत सिंह, दीपेन्द्रसिंह ऐरी, र ईशान पाण्डेले समान २-२ विकेट लिए।
एनपीएलमा यो सिजनको सबैभन्दा कम स्कोर पनि यही खेलमा जनकपुरले बनाएको छ। यसअघि, चितवन राइनोजसँगको खेलमा पोखरा एभेन्जर्स ७४ रनमै समेटिएको थियो।
लुम्बिनी ६ खेलमध्ये १ मात्र खेल जितेर प्लेअफ होडबाट बाहिरिएको छ। काठमाण्डूले भने ४ खेलमा २ जित निकाल्दै ४ अंकसहित प्लेअफ सम्भावना जीवित राखेको छ।
