विराटनगर/ नेपाल प्रिमियर लिग (एनपिएल) को एक रोमाञ्चक खेलमा लुम्बिनी लायन्सले विराटनगर किंग्सलाई १९२ रनको विशाल लक्ष्य दिएको छ। विराटनगरले टस जितेर फिल्डिङ रोजेपछि पहिले ब्याटिङ गरेको लुम्बिनीले ७ विकेट गुमाएर १९१ रनको प्रतिस्पर्धात्मक स्कोर खडा गर्यो।
लुम्बिनीका कप्तान रोहित कुमार पौडेलले सर्वाधिक ४६ रनको योगदान दिए। उनले २९ बलमा ४ चौका र २ छक्का प्रहार गरे। अन्तिमतिर विवेक यादवले ७ बलमा ३ छक्का हान्दै नटआउट १९ रन बनाए।
ओपनरद्वय आशुतोष घिरैया र अर्जुन साउदले क्रमशः १५ र १७ रन बनाए। चौथो ओभरमा निकोलास किर्टोनबाट रनआउट भएका घिरैयाले १३ बलमा २ चौका र १ छक्का प्रहार गरेका थिए। अर्जुन इस्मत आलमको बलमा बोल्ड हुनुअघि १९ बलमा ३ चौका प्रहार गरे।
लुम्बिनीका अन्य ब्याटरमध्ये टस मुर्सले १७ बलमा ३० रन (१ चौका, ३ छक्का) जोडे। सन्दीप जोराले १३ बलमा १२ रन बनाए भने साद बीन जफरले १३ बलमा १५ रन जोडे।
विराटनगरको बलिङतर्फ कप्तान सन्दीप लामिछाने, इस्मत आलम र राजेश पुलामीले समान १/१ विकेट लिए। लुम्बिनीका चार ब्याटर रनआउट भएका थिए।
एनपिएलमा विराटनगर किंग्स यसअघि खेलेका दुवै खेलमा पराजित भइसकेको छ भने लुम्बिनीले आफ्नो पहिलो खेल खेलिरहेको हो। विराटनगरका लागि यो खेल कठिन चुनौती सावित हुने देखिएको छ।
