विराटनगर / नेपाल प्रिमियर लिग (एनपीएल) क्रिकेटको रोमाञ्चक खेलमा चितवन राइनोजले काठमाडौँ गुर्खाजलाई ५ विकेटले हराउँदै उत्कृष्ट प्रदर्शन गरेको छ। कीर्तिपुरस्थित त्रिवि क्रिकेट मैदानमा सम्पन्न खेलमा काठमाडौँले प्रस्तुत गरेको ११२ रनको लक्ष्य चितवनले १७.१ ओभरमा ५ विकेट गुमाउँदै पूरा गर्यो।
चितवनका सन्तोष कार्कीले २८ रन र विदेशी खेलाडी लुक बेनकेनस्टाइनले २२ रनको महत्वपूर्ण योगदान दिए। बलिङतर्फ काठमाडौँका शाहब आलमले सर्वाधिक ३ विकेट लिए भने गेहरार्ड इरस्मस र डान डौथवेटले १–१ विकेट झारे।
यसअघि टस हारेर पहिला ब्याटिङको निम्तो पाएको काठमाडौँ गुर्खाजले २० ओभरमा ९ विकेटको क्षतिमा मात्र १११ रन बनायो। टोलीका लागि सुमित महर्जनले सर्वाधिक २९ रन बनाए भने माइकल लेभिटले २५ र डान डौथवेटले १९ रनको योगदान दिए।
चितवनका बलरहरू आजको खेलमा शानदार रहे। विदेशी खेलाडी सोहेल तनभिरले ४ ओभरमा ५ विकेट लिँदै काठमाडौँको इनिङ ध्वस्त पारे। रिजन ढकाल, कुशल मल्ल, अमर राउटेला र लुक बेनकेन्स्टाइनले पनि १–१ विकेट लिए।
एनपीएल अन्तर्गत आज दिउँसो १:१५ बजे जनकपुर बोल्ट्स र कर्णाली याक्सबीच प्रतिस्पर्धा हुँदैछ।
यस जीतसँगै चितवन राइनोजले प्रतियोगितामा आफ्नो स्थिति थपसुदृढ बनाएको छ।
