६८औं राष्ट्रिय सहकारी दिवस दीप प्रज्वलन कार्यक्रमको आयोजना भव्य रुपमा सम्पन्न      विराटनगर, चैत १९ – “मर्यादित सहकारीः समुन्नत समाज” नाराका साथ ६८औं राष्ट्रिय सहकारी दिवस दीप प्रज्वलन कार्यक्रमको आयोजना भव्य रुपमा सम्पन्न भएको छ। दिवसको पूर्वसन्ध्यामा चैत १९ गते साँझ विराटनगर महानगरपालिका, महेन्द्रचोकमा दीप प्रज्वलन कार्यक्रमको आयोजना गरियो।
दीप प्रज्वलन कार्यक्रम उपसमिति संयोजक सीता लामिछानेको संयोजनमा सम्पन्न भएको थियो। उक्त कार्यक्रममा प्रमुख अतिथि राष्ट्रिय सहकारी महासंघका वरिष्ठ उपाध्यक्ष रमेश पोखरेलले दीप प्रज्वलन गरेका थिए। कार्यक्रममा विभिन्न सहकारी संस्थाका प्रतिनिधिहरूको उत्साहजनक सहभागिता रहेको थियो।
यसैक्रममा, चैत १८ गते सोमबार साँझ ४ बजे विराटनगरको पुष्पलाल चौकबाट बृहत् मोटरसाइकल र्याली निकालिएको थियो। उक्त र्याली पुष्पलाल चौकबाट सुरु भई रोडशेष चौकमा पुगेर समापन भएको थियो। सहकारी अभियन्ता, विभिन्न संघ-संस्थाका प्रतिनिधि तथा स्थानीय नागरिकहरूको उल्लेखनीय उपस्थिति रहेको यस र्यालीले सहकारी अभियानलाई थप ऊर्जा प्रदान गरेको छ।
चैत २० गते ६८औं राष्ट्रिय सहकारी दिवसका अवसरमा कोशी प्रदेश सरकारको समन्वयमा मूल समारोह समिति मोरङले झाँकी र्याली तथा मूल समारोह आयोजना गरेको छ। उक्त कार्यक्रमको प्रमुख अतिथि कोशी प्रदेशका मुख्यमन्त्री माननीय हिक्मत कुमार कार्की रहनेछन्।
मुख्य कार्यक्रम विराटनगरको पान्चालीस्थित कञ्चनजङ्घा पार्टी प्यालेसमा चैत २० गते बिहान ११:३० बजे सुरु हुनेछ। कार्यक्रममा सहकारी क्षेत्रका विशिष्ट व्यक्तित्व, प्रदेश तथा स्थानीय तहका प्रतिनिधि, सहकारी अभियन्ता तथा सरोकारवालाहरूको उपस्थिति रहनेछ। मूल समारोह समिति-२०८१ मोरङका संयोजक डा. डिल्ली पोखरेलका अनुसार सहकारीको सशक्तीकरण र प्रवर्द्धनका लागि यस्ता कार्यक्रमहरू प्रभावकारी हुने विश्वास गरिएको छ।