नेपाल पत्रकार महासंघद्वारा देशव्यापी विरोध, दोषीउपर कारबाहीको माग
विराटनगर, राजावादीहरूको प्रदर्शनका क्रममा पत्रकार सुरेश रजकको हत्या र विभिन्न सञ्चारमाध्यममाथि भएको सुनियोजित आक्रमणको विरोधमा नेपाल पत्रकार महासंघले देशव्यापी विरोध कार्यक्रमको आयोजना गरेको छ। महासंघका शाखाहरूले जिल्लास्तरमा प्रमुख जिल्ला अधिकारीमार्फत सरकारलाई ज्ञापनपत्र बुझाएका छन्।
नेपाल पत्रकार महासंघ केन्द्रीय समितिको निर्देशनअनुसार मंगलबार देशभरका शाखाहरूले जिल्ला प्रशासन कार्यालयमा विरोध स्वरूप ज्ञापनपत्र बुझाएका हुन्। महासंघले दोषीउपर कारबाही हुनुपर्ने, पीडित परिवारलाई राहत प्रदान गर्नुपर्ने, घाइते पत्रकारहरूको उपचारको व्यवस्था मिलाइनुपर्ने, तथा पत्रकारहरूको सुरक्षाको ग्यारेन्टी गरिनुपर्ने माग अघि सारेको छ। महासंघले माग पूरा नभए चरणबद्ध आन्दोलन चर्काउने चेतावनी दिएको छ।
मोरङ र सुनसरी शाखाद्वारा ज्ञापनपत्र बुझाइयो नेपाल पत्रकार महासंघ मोरङ शाखाले विराटनगरमा प्रमुख जिल्ला अधिकारी इन्द्रदेव यादवलाई ज्ञापनपत्र बुझाएको छ। शाखाकी अध्यक्ष सुशीला पाठकसहित पदाधिकारीहरू तथा पूर्वअध्यक्षहरू उपस्थित रहेको उक्त कार्यक्रममा महासंघले पत्रकारमाथि भएका आक्रमणको निन्दा गर्दै दोषीउपर कडा कारबाहीको माग गरेको छ।यसैगरी, सुनसरी शाखाले प्रमुख जिल्ला अधिकारी धर्मेन्द्र मिश्रलाई ज्ञापनपत्र बुझाएको छ। शाखा अध्यक्ष सन्तोष काफ्ले नेतृत्वको टोलीले ज्ञापनपत्र बुझाउँदै पत्रकारको सुरक्षा सुनिश्चित गर्न सरकार गम्भीर हुनुपर्नेमा जोड दिएको छ। महासंघ सुनसरीका सचिव विनय बाराकोटीका अनुसार केन्द्रीय समितिको घोषित कार्यक्रमअनुसार ज्ञापनपत्र बुझाइएको हो।
सञ्चारमाध्यममाथि आक्रमणको विरोध राजावादी प्रदर्शनका क्रममा अन्नपूर्ण पोस्ट, कान्तिपुर टेलिभिजनलगायत विभिन्न सञ्चारमाध्यममाथि ढुंगामुढा तथा आगजनी गरिएको घटनाको पनि महासंघले कडा भर्त्सना गरेको छ। महासंघ कोशी प्रदेशले सोमबार मुख्यमन्त्री हिक्मत कार्कीलाई ज्ञापनपत्र बुझाउँदै घटनाको निन्दा गर्दै छानबिन र दोषीउपर कारबाहीको माग गरिसकेको छ।यसैबीच, नेपाल पत्रकार महासंघ केन्द्रीय समितिले पत्रकारहरूले कार्यक्षेत्रमा कालोपट्टी बाँधेर काम गर्ने लगायतका विरोधका कार्यक्रमहरू घोषणा गरिसकेको छ। महासंघले पत्रकारिता पेशामाथिको आक्रमणप्रति सरकार गम्भीर नभए थप सशक्त आन्दोलन गर्ने चेतावनी दिएको छ।