राष्ट्रिय सहकारी दिवस २०८१ को मूल कार्यक्रम विराटनगरमा हुने
विराटनगर, मोरङ – यस वर्षको राष्ट्रिय सहकारी दिवस २०८१ को मुख्य कार्यक्रम विराटनगरमा आयोजना हुने भएको छ। चैत्र २० गते हुने उक्त कार्यक्रमलाई भव्य बनाउन ५०१ सदस्यीय मूल समारोह समिति गठन गरिएको छ, जसको संयोजक जिल्ला सहकारी संघ लि. मोरङका अध्यक्ष डा. डिल्ली पोखरेल रहनुभएको छ।
कार्यक्रममा कोशी प्रदेशका मुख्यमन्त्री हिक्मत कुमार कार्की प्रमुख अतिथिको रूपमा उपस्थित हुने जनाइएको छ। कार्यक्रमलाई व्यवस्थित बनाउन १२ वटा उपसमितिहरू गठन गरिएका छन्।
कार्यक्रम तयारी र उपसमिति गठन
कार्यक्रमलाई सफल बनाउन विभिन्न उपसमितिहरू गठन गरिएको छ, जसमा:
- प्रचार प्रसार उपसमिति – संयोजक विजयहरी खतिवडा
- स्वास्थ्य उपसमिति – संयोजक जितेन्द्र झा
- झाँकी व्यवस्थापन उपसमिति – संयोजक विजयकुमार माझी
- दिप प्रज्वलन उपसमिति – संयोजक सीता लामिछाने
- हलमंच व्यवस्थापन उपसमिति – संयोजक राकेश दाहाल
- खानेपानी उपसमिति – संयोजक नारायण ढकाल
- स्वागत सत्कार उपसमिति – संयोजक पार्वता बराल
- पार्किङ व्यवस्थापन उपसमिति – संयोजक गोपाल धिताल
- र्याली व्यवस्थापन उपसमिति – संयोजक गोबिन्द निरौला
- स्वयंसेवक व्यवस्थापन उपसमिति – संयोजक ई. कमलेश्वर ठाकुर
- आर्थिक व्यवस्थापन उपसमिति – संयोजक अमृत गुरुङ
पूर्वकार्यक्रमहरू
मुख्य कार्यक्रममा सहकारीकर्मीहरूको उत्साहजनक सहभागिता सुनिश्चित गर्न विभिन्न पूर्वकार्यक्रमहरू पनि तय गरिएको छ:
- चैत्र १८ गते साँझ ४ बजे पुष्पलाल चौकबाट बृहत मोटरसाइकल र्याली निकालिनेछ।
- चैत्र १९ गते साँझ ६ बजे महेन्द्र चौकमा दिप प्रज्वलन कार्यक्रम गरिनेछ।
हजारौँ सहकारीकर्मीहरूको उपस्थिति अपेक्षित
प्रचार उपसमितिका सह-संयोजक अविनाश निधि का अनुसार मोरङ जिल्लाका करिब ९०० सहकारी संघ/संस्थाबाट हजारौँ सहकारीकर्मीहरू विराटनगरमा सहभागी हुनेछन्।
जिल्ला बहुउद्देश्यीय सहकारी संघ लि. मोरङका अध्यक्ष माधव अधिकारी ले हिजो सम्पन्न उपसमितिहरूको बैठकले कार्यक्रम तयारीका महत्वपूर्ण निर्णयहरू गरेको जानकारी गराउनु भयो।