विराटनगर /सानै उमेरमा आफ्ना बाबु र आमा दुबै जनालाई गुमाएर अभिभावकविहीन बनेका तीनजना बालबालिका हुर्काउने जिम्मेवारी ७० वर्षे हजुरआमा कमला सुडीको काँधमा आइपरेको छ ।

आर्थिक अवस्था कमजोर भएकी कमलाको काँधमा अचानक तीन नातिनातिनी हुर्काउने जिम्मेवारी आइपरेपछि उनी सडकमा मागेर ती सन्तानको संरक्षण गर्न बाध्य बनेकी छन् । मोरङको धनपालथान गाउँपालिका ४ कर्सिया बजारमा बसेर नातीनातिनी हुर्काउँदै आइरहेकी कमलालाई ती बालबालिकाको बाबुआमा दुबै हुँदा खासै चिन्ता थिएन । बाबु सन्तोष अटो चलाउँथे । उनले कमाएको पैसाले घरपरिवार चलेकै थियो । बुहारी कमला साह पनि घर व्यवहारसँगै रोजीबनी गरेर केही कमाउँथिन् । त्यसले छोराछोरी पढाउन सहयोग पुगेको थियो । तर दुई वर्षअघि सन्तोषको मृत्यु भयो । छातीमा सामान्य समस्या भएर उपचारका लागि अस्पताल गएका सन्तोषको मृत्यु भएको ६ महिना पछि नै उनकी पत्नि कमलाको पनि मृत्यु भयो । त्यसपछि सबै अभिभावकविहीन बालबालिकाको जिम्मेबारी हजुरआमाको बाँधमा आइपर्यो ।बुबाआमाको काखमा रमाउँदै पढ्ने उमेरका बालबालिका यतिबेला चरम अभावकसँग जुधिरहेका छन् भने उनीहरुको पठनपाठन र भोक टार्नका लागि हजुरआमा बाटोमा बसेर माग्नु पर्ने बाध्यतामा पुगेकी छन् ।

ती वृद्ध उमेरकी हजुरआमाले जसोतसो जोहो गरेर ल्याएको रकम र सामलबाट १५ वर्षे लक्ष्मी साह, १३ वर्षे अंजली साह र १० वर्षे भविष साहको हातमुख जोर्ने काम भइरहेको छ । दुःख गरेर भए पनि कमलाले नातिनातिनीलाई पढाउन भने छाडेकी छैनन् । उनले महिनाको दुई हजार रुपैयाँमा डेरा लिएर उनीहरुलाई पढाउँदै आएकी छन् । लक्ष्मी कक्षा १० मा अध्ययनरत छन् । यस्तै अंजली कक्षा ८ र भाइ भविष कक्षा ४ मा श्री सारदा माध्मिक विद्यालयमा अध्ययनरत छन् ।

साना बालबालिकाहरुको अवस्था र उनीहरुलाई हुर्काउन वृद्ध हजुरआमाले गरेको दुःख देखेर स्थानीयले पनि सहयोग गर्दै आएका छन् । आर्थिक अवस्था निकै कमजोर हुँदा कमलाले चार महिनादेखि कोठा भाडा पनि तिर्न सकेकी छैनन् । ‘मागेर ल्याएको पैसाले एकछाक मात्र खान पुग्छ,’ कमलाले भनिन् ‘पहिले यिनीहरुको जीवन बचाउन पर्यो भन्दा कोठा भाडा तिर्न सकेको छैन ।’

कमला राम्ररी आँखा देख्दिनन् । वृद्ध उमेर हुँदै गएकाले उनको आँखा कमजोर भएको छ । बाबुआमा गुमाएको र पुख्र्यौली सम्पत्ति केही नभएकोले उनीहरुको भविष्यले उनलाई सँधै पिरोल्छ । एउटा बस्ने छाप्रोमात्र भए केही गरेर खाने आधार बन्ने उनी बताउँछिन् ।कमलाको पछिल्लो अवस्था देखेर सकेको सहयोग गर्दै आएकी विमला पराजुलीले सहारा नभएका यस्ता बालबालिका र जेष्ठ नागरिकप्रति स्थानीय सरकारले सहयोग गर्नुपर्ने बताइन् । उनले यी बालबालिकाको भविष्यका लागि पनि सबैले सहयोग गर्नुपर्ने भन्दै मिडियाको सहयोग पनि आवश्यक रहेको बताइन् ।

बालबालिकाहरुको अवस्थाका बारेमा जानकारी पाएपछि गाउँपालिकाकी उपाध्यक्ष नसिमा बानाले उनीहरुको कोठाभाडा आफूले तिरिदिन तयार रहेको बताइन् । उनले भनिन् ‘म उहाँहरुको कोठा भाडा तिर्न तयार छु र उनीहरुका लागि बस्ने घर बनाउन दातृसंस्थाहरुसँत तत्कालै प्रस्ताव गर्नेछु ।’ उनले केही दिन जग्गादाता खोजी गर्ने नपाएमा ऐलानी जग्गामै भए पनि घर बनाएर बासको व्यवस्था मिलाउने आश्वासन दिइन् ।