विराटनगर/ नेपाल प्रिमियर लिग (एनपीएल) क्रिकेट प्रतियोगितामा आज शनिबार दुई महत्वपूर्ण खेल हुँदैछन्।

बिहान ९ बजे पहिलो खेलमा लुम्बिनी लायन्स र सुदूरपश्चिम रोयल्स प्रतिस्पर्धामा उत्रनेछन्। लुम्बिनी लायन्सका लागि यो खेल महत्त्वपूर्ण मानिएको छ किनभने टोलीले यसअघि खेलेका दुवै खेलमा पराजय ब्यहोरेको छ। अपराजित रहेको सुदूरपश्चिम रोयल्स भने उच्च आत्मविश्वासका साथ मैदानमा उत्रनेछ। सुदूरपश्चिम ४ अङ्कसहित तालिकाको दोस्रो स्थानमा रहेको छ भने लुम्बिनी शून्य अङ्कसहित पुछारमा छ।

दिउँसो १ बजे दोस्रो खेलमा कर्णाली याक्स र विराटनगर किङ्ग्स भिड्नेछन्। दुवै टोलीले यसअघिका तीन खेलमध्ये एउटा खेल मात्र जितेका छन्। कर्णाली छैटौं स्थानमा र विराटनगर सातौं स्थानमा रहेका छन्। तालिकाको शीर्ष स्थानमा भने तीन वटै खेल जितेको जनकपुर बोल्ट्स ६ अङ्कसहित कायम छ।

आजका खेलहरूबाट टोलीहरूको तालिका स्थिति कस्तो रहनेछ भन्ने कुरामा सबैको ध्यान केन्द्रित भएको छ। क्रिकेटप्रेमीहरू यी खेलहरूको उत्साहका साथ प्रतिक्षा गरिरहेका छन्।