काठमाडौँ / एसइई को मौका परिक्षा नतिजा असोज महिनाको पहिलो हप्ता प्रकाशन गर्ने राष्ट्रिय परीक्षा बोर्ड परीक्षा नियन्त्रण कार्यालयले तयारी गरेको छ ।
राष्ट्रिय परीक्षा बोर्ड परीक्षा नियन्त्रण कार्यालय, कक्षा–१० का उप–नियन्त्रक भक्त गोदारले असोज पहिलो सातासम्ममा नतिजा प्रकाशन गर्ने गरी काम भइरहेको जानकारी दिए । उनका अनुसार अहिले धमाधम इन्ट्री र उत्तरपुस्तिका परीक्षणको काम भइरहेको छ ।
मिति २०८० साल चैत्र १५ गते देखि सञ्चालन भएको एसइई परीक्षामा नियमित परीक्षार्थीको ग्रेड प्राप्त गर्न नसकेका र अनुपस्थित भएका सबै परीक्षार्थीहरूका लागि पूरक (ग्रेड वृद्धि) परीक्षा श्रावन २३ गतेदेखि ३१ गतेसम्म सञ्चालन भएको थियो ।
बोर्डले ३५ प्रतिशतभन्दा कम ल्याए ननग्रेडेड अर्थात् विद्यार्थीहरू फेल हुने निर्णय गरेको थियो । जसअनुसार धेरै विद्यार्थीहरू फेल भएपछि सरकारको चर्को आलोचना भयो । त्यसपछि शिक्षा, विज्ञान तथा प्रविधि मन्त्रालयले एसइईमा दुईभन्दा बढी विषयमा एनजी अर्थात् नन ग्रेड ल्याएका विद्यार्थीलाई पनि मौका परीक्षामा सहभागी गराउने निर्णय गरेको थियो ।
तर सरकारले नयाँ लेटरग्रेडिङ निर्देशिका लागू गर्दा परीक्षामा सहभागी ४ लाख ६४ हजार ७८५ जना विद्यार्थीमध्ये करिब ४८ प्रतिशत विद्यार्थीमात्र उत्तीर्ण भएका थिए । ५२ प्रतिशत अर्थात् २ लाख ४२ हजार ३१३ जना फेल (एनजी) भए । राष्ट्रिय परीक्षा बोर्डले गत असार १३ गते एसइईको नतिजा सार्वजनिक गरेको थियो ।
परीक्षा बोर्डका अनुसार उक्त मौका परीक्षामा एसइई परीक्षामा अनुत्तीर्णको संख्या दुई लाख ४२ हजार भन्दा बढी भए पनि दुई लाख १० हजार मात्रै परीक्षामा सहभागी भएका छन् । फाराम भरेका ३२ हजार विद्यार्थीहरू भने परीक्षामा सहभागी पुन्न भएनन् ।