विराटनगर/विराटनगर-९ स्थित भिआइपी रोडमा रहेको जेएनएल फुटसलमा आगामी भाद्र १० गतेदेखि यू-१४ फुटसल टुनामेन्ट हुने भएको छ। यो प्रतियोगिता बिहान ८ बजेबाट सुरु हुनेछ। फुटबलको परिमार्जित स्वरुप फुटसलमा विराटनगरका युवाहरुको उल्लेखनीय सहभागिता हुँदै आएको छ। यस प्रतियोगिताले यू-१४ का खेलाडीलाई प्रतिस्पर्धात्मक प्लेटफर्म प्रदान गरेर होनहार फुटबलरहरुको पहिचान र विकासमा महत्वपूर्ण योगदान दिँदै आएको छ।
यसैलाई मध्यनजर गर्दै खेलकुदप्रतिको विराटनगरको ‘क्रेज’ लाई कायम राख्ने उद्देश्यले विराटनगर महानगरपालिका–९ का शुभाशीष कोइरालाले सञ्चालनमा ल्याएको जेएनएल फुटसलले खेलाडीहरुको पहिचान र विकासमा निरन्तरता दिँदै आएको छ।
विराटनगर सिटी एफसीले आयोजना गरेको यस यू-१४ प्रतियोगितामा ८ वटा टिमले सहभागीता जनाउने भएका छन्। प्रतियोगितामा बिसीएफसी, रानी आँखा, डिपिएस एकेडेमी, जेएनएल, जनपथ एकेडेमी, नवयुवा क्लब, गोल्डेन स्टार जुनियर, र बुडीगंगा स्पोर्ट्स क्लब गरी आठवटा टिमहरू प्रतिस्पर्धा गर्ने छन्।
प्रतियोगिताका बिजेताले ५००० नगदसहित ट्रफी र मेडल प्राप्त गर्ने छन् भने दोस्रो हुनेले २००० नगदसहित ट्रफी र मेडल जित्नेछन्। यस प्रतियोगिताले विराटनगरमा युवा खेलाडीहरुको विकास र खेलकुदप्रतिको उत्साहलाई थप बलियो बनाउने विश्वास गरिएको छ।
